2013年12月13日 星期五

潤唇膏

潤唇膏其實一年365日都要用,亦可以因應唔同天氣、場合同需要換下唔同牌子黎用。無論有色定係冇色的潤唇膏都有可取之處,首先講下無色潤唇膏啦 。我有以下幾支︰



左一︰ES Super Lip Gloss
左二︰Dr. Rimpler Sun Stick SPF30
中︰Banana Boat Aloe Vera with Vitamin E SPF30
右二︰Neutrogena Lip Moistrizer SPF 15
右一︰YSL Top Secret Re-Plumping Concentrate Lip Shaper

ES Super Lip Gloss
呢支係在靚靚買的日本牌子叫 ES,上個月我試左 ES 支蘆薈爽膚水覺得幾好,剛巧有聖誕套裝賣 (潤唇膏加一支 peeling 都係二百幾蚊),就買黎試下。ES 呢支個名叫「Lip Gloss」,我只可以講係一半對一半錯。先講下質地,搽上咀係無色無香無味透明 gel 狀,感覺幾滋潤同幾持久 (最少半日),唔會飲杯水就冇左。見佢寫佢係 Lip Gloss,就諗住可以令唇妝更有光澤掛。但係我試過用黎做唇妝打底或搽上面,都唔係果回事。無論你搽咩唇膏、唇彩,無論係幾不脫色同持久都好,會同你溶哂佢。所以我只會在晚上用,或者係喜歡自然唇色的人可以試下,因為唔用任何唇膏,佢真係可以令係唇色有搽左 lip gloss 的感覺,似係玻璃咀 feel,冇香味亦冇甜味之類,亦都算幾易搽,值得試下。

Dr. Rimpler Sun Stick SPF30
呢支係我幾年前生唇瘡時在卓悅買的,佢擰出黎係好似油油地果質感,有少少軟身,成陣藥味 (我唔識珍容係邊隻藥味),而且陣藥味仲要係好難聞!搽上咀感覺都好滋潤,至於唇瘡嘛,都改善到少少既,但不能根治。可能係我懷孕時唔知缺少左 D 咩,生左 BB 就冇哂 D 唇瘡,所以我唔肯定呢支野得唔得。但係在日常情況下,我係唔會再用呢支咁難聞的潤唇膏了。

Banana Boat Aloe Vera with Vitamin E SPF30
有好多朋友推介我用呢支,話好潤好好用,見咁平就買左支黎試。包裝上寫住有蘆薈同維他命E,對呢支產品有有少少期望的。但係我唔喜歡佢太臘質,搽上咀時有少少香香甜甜咁,但一 D 都唔滑,質感都幾乾下,如果大力少少搽,咀唇有機會脫皮。搽左上咀之後滋潤度唔太覺,反而覺得有層臘封住個咀,完全唔舒服。如果在上面加唇妝,會攪到一撻撻,想搽多幾層咩,又係脫皮。所以,呢支已經冇用好耐。

Neutrogena Lip Moistrizer SPF 15
呢支係我最喜愛的潤唇膏,除左價錢平同易買之外,就係質地夠滑夠滋潤,又係有少少油潤的感覺,好易搽亦唔駛搽幾層就已經夠潤。之後再上唇妝又唔會溶左 D 唇膏出黎,係我日間必用的潤唇膏!

YSL Top Secret Re-Plumping Concentrate Lip Shaper
我真係極度喜愛呢支,未用完已經回購定,實在太太太太太正了!點正法?佢唧出黎係白色好似唇蜜咁既質地,搽上咀有種香甜 (但不人工) 的味道。易推開,就咁搽都幾令,唔搽唇膏淨搽呢支都好靚。一般我係晚上用,厚厚搽一層在咀上當唇 mask,第二朝起身個咀係冇乾紋的。YSL 的 BA 有建議我加砂糖可以做埋磨砂,但我又唔捨得,所以一直都係晚間用。之後亦試過在日間薄搽一層,之後再上唇妝,效果好貼同望上去好潤,成個唇妝都醒神哂!雖然呢支係幾貴 (好似三百蚊左右),但效果實在太好,所以我會繼續回購、回購再回購… 

今次講完無色的潤唇膏,下次講下有色潤唇膏啦。

2013年12月12日 星期四

YSL 精華粉底液及粉餅

收到 YSL 發給會員的短訊,有試用裝換,我當然不甘後人走去換啦,就係呢個 cream。



唉!我認我係購物狂冇定力,換完野之後唔即刻走仲左望右望,同埋我認我好想買呢支粉底好耐,所以唔覺意又買左粉底,仲配埋粉餅。


呢支粉底係今年新出,賣點係含有精華素 (仲係我用開果支精華素),我之前拎過 sample 試,感覺好貼同埋唔乾,好適合乾性皮膚用。而且持久度都 OK,唔多駛補妝,又唔出乾紋,真係非常喜歡呢支粉底!但係我已經有5支粉底了,再買實在太過份了。所以一直忍手冇買。點知今日去換野時,見到有客人試緊,又心思思想試下 (我明明已經試過啦,仲要走去試,擺明係送上門比錢人駛… V.V)。

之前自己試係用 Laura Mercier 碎粉定妝,效果都唔錯。今次在專櫃試,係用呢個粉餅做定妝,出黎效果比起 LM 的碎粉更透亮,終於忍唔到手,又買粉底了。

好多時我買粉底都鐘意配埋粉餅,因為補妝時唔會出現色差。其實有少少色差又唔係好覺眼既,但係我唔想補完妝個鼻同咀邊會同塊面唔同色,所以我都有幾盒粉餅,唔知幾時先至用得完。

我發誓,今個冬天唔再買粉底!

2013年12月11日 星期三

睫毛液

睫毛液是菲菲每天必搽的眼妝產品。我的睫毛都算密,係密到冇咩位可以畫內眼線的程度,所以我特別喜歡增長效果的睫毛液。以前我都有用彩色的睫毛液,現在只愛用黑色,同埋只用防水防油的,情願花多少少時間落妝 (其實用植村秀的卸妝油,都唔駛好多功夫都落得好乾淨),都唔想 D 睫毛液溶哂落眼袋。

咁多年黎,我試過無數專櫃品牌的睫毛液,相信除左 MJ 之外,都冇乜邊隻係唔溶。我常用的只有幾支,因為睫毛液唔用會好快乾,所以唔會購入太多存貸。我唔太喜歡夾睫毛,我會在掃睫毛液時在睫毛根部輕輕向上固定一陣,再向上拉,就會造出自然捲曲的效果。以下呢幾隻係我現在常用的睫毛液。



左一︰Mabeline Rocket Volume Express
左二︰Kiss Me Long & Curl Mascara
左三︰Lash Sculpture Long Separate Mascara
左四︰Cle de peau

Mabeline Rocket Volume Express
呢支係4支中最濃密的,亦都做到根根分明的效果。刷頭係4支中最大,但都算易用,同埋用黎掃下眼睫毛都幾方便,只要來回擦幾下,再做少少拉長就可以了。Mabeline 的睫毛液都係出名濃密同持久,我都好同意呢點。同埋就算唔夾睫毛,只要用我以上提出的方法去拉睫毛,呢支做出黎的效果係最捲曲的。同時做到增量又唔會令睫毛 drop,係我日常最愛用的一支。

Kiss Me Long & Curl Mascara
呢支係4支中最最最防水防油,同埋難卸的!同埋只可以增長,少少增量都做唔到,唔多適合睫毛不夠密的女孩。呢支搽出黎質感比較硬身,感覺唔夠自然。好處就係適合戶外場合,點熱點出汗都好,流哂眼淚都好,都一定唔會溶。不過我都唔會回購呢支,太難卸了,同埋完全做唔到濃密,搽完 D 睫毛太過一支支的感覺,我不是太喜歡。

Lash Sculpture Long Separate Mascara
呢支係我用左唔知第幾支的睫毛液了,用了很多年,係必定回購之選。佢係梳型刷頭,新手可能要熟習一下先至用得好,但當你一同佢熟絡左之後,佢就會成為你的好朋友。如果配合不用手勢,係可以同時做到濃密同增長的效果,唔會溶但好易卸,你話幾 perfect 呢!但佢有唯一一個唔好處,就係唔可以乾左之後搽第二層,會整到一舊舊。所以在搽第一層時,就要確保在睫毛液未乾時搽出你想要的效果。呢支亦適合做最後一層,例如你用了另一牌子的濃密睫毛液但係唔夠長,或用了一隻可能會溶的睫毛液,就可以用呢支掃最後一層睫毛液,既可以增長,亦可以做保護,令其他睫毛液唔會溶。

Cle de peau
呢支係我買過最貴的睫毛液,用完之後係唔會回購。呢支睫毛液好似有 D 纖維咁可以令睫毛增量同增長,但比 Lash Sculpture 難卸。出黎的效果我覺得同 Lash Sculpture 差唔多,所以唔認為要花咁貴去買一支睫毛液。

我係好鐘意買化妝品,不過睫毛液係一個比較得別的 item,不會不停試新野,只要有一至兩支用得好,就會繼續回購回購又回購…



2013年12月9日 星期一

閃爍華麗 - Maquillage 2013 聖誕套裝

資生堂今年出了幾套聖誕套裝,只有一套係化妝品,其他套裝感覺太細支好似 sample,所以就選了呢套閃令令又香噴噴的套裝。



我的攝影技術有待改進,包涵包涵!

右邊的是一盒有淡淡香氣的七色粉,呢盒七色粉有少少閃亮效果,在定妝後薄薄掃一層在面頰、額頭、鼻樑同下巴位,就可以做出一個不浮誇的光影效果。盒內附有一個軟林林的粉樸,但我沒有用。一般係用碎粉掃在盒內掃一圈,已足夠我掃哂全部位置。

,左邊係一支香水 gel 同一支珠光唇彩。支唇彩點用就唔駛多講啦,都係做下豐唇或者索性做個爆閃既咀都得。至於支香水 gel,唧出黎係好水狀的 gel,內有細細粒閃粉,可以搽在肩頸上,就會令鎖骨有淡淡閃亮的效果。氣味有少少濃,有點冬季或晚間派對 feel,當然都好視乎個人喜好啦。我都幾鐘意,不過未必會夏天用,同埋唔會搽肩頸位,只係當一般香水咁搽在耳背同脈門位。呢隻香水 gel 持久都算可以啦,半日都冇問題既,去玩時用就幾適合。

呢套產品營造一個較華麗的閃妝,並不會做到爆閃果種風格,適合比較斯文的女孩。

2013年12月8日 星期日

瘋購聖誕套裝 @ Bobbi Brown

每年聖誕節,各牌子都推出聖誕套裝,有好多都係限量版,即係聖誕過後售完即止。今年,我比三大品牌的聖誕套裝吸引了,一間當然係我最愛的資生堂 (下篇再講我買左邊套),另一間就係我都幾愛用的 YSL (只係買左一盒眼影盤),最後一個就係我好少光顧的 Bobbi Brown。

以前我有用過呢個牌子的粉底,質地好就幾好,但顏色方面嘛,太 earth tone 了,搽了粉仲好似黑左咁 (我已經係買當時最淺色了!V.V)。而且我最愛買的眼影和唇膏都唔太合眼緣,所以我已有幾年冇買 Bobbi Brown 的產品了。

11月尾,各大品牌都開始攻聖誕市場,我在網上看到 Bobbi Brown 推出了好幾套限量版眼影盒都好靚,所以忍唔住去專櫃度睇下。今次出左幾套紫系眼影 (我最愛紫系眼影,很少用啡系),仲有光影粉。睇下揀下,就買左以下一堆了…



左一的係閃粉,可單用 (不過好考手勢,好細格),亦可用斜角掃一下掃哂成行,就可做比較自然的提亮效果。

最上係 Smoky Cool 眼影盒,個人極喜愛紫色,仲有支掃質地好好,所以呢盒係第一時間買的。

左二係一套眼影 (黑、銀、白) 加唇膏 (我愛紅唇妝嘛) 同埋一支迷你唇彩,點少少在唇中央或內唇位置,可做豐唇效果。呢套好 party,暫時未有機會用。

右邊最大盒係十色眼影加四色唇膏。個人較喜歡眼影部份,因顏色不算好深 (左上同左下2格除外),配紅唇妝好靚!但唇膏嘛,搽幾層都唔太出色,可能夏天會適合D。

友人戲言,菲菲咁鐘意買化妝品,Bobbi Brown 冇理由幾年都做唔到我生意,所以專登整呢堆聖誕套裝出黎,就係要我呢 D 紫系粉絲都要幫襯佢!無言…

講開眼影,我都係偏愛紫色。當然啡綠藍橙金等等我咩色都有買過用過,但最適合我個性同皮膚色調的始終係紫色。以往流行裸妝同 earth tone,我試過係完全唔適合我,個妝化完好似塊面污漕左咁。就算玩盡光影同閃粉,都係似個乞丐面上泛油,所以有好幾年我冇光顧過以裸妝同 earth tone 做主打看品牌。至於我最愛的資生堂嘛,一直都有出好靚的紫系眼影,襯埋帶粉紅調的粉底,妝容顯得特別華麗有神。

化妝要配合個人風格,好似而家流行的一字眉,我都試過了,絕對不是我杯茶。

2013年12月6日 星期五

每晚一片 Paper Mask

當濕度低的時候,除了要換比較滋潤的護膚品之外,我仲會每晚都敷面膜。在冬季我愛用 paper mask,因為敷完仲要洗走的面膜,感覺較為爽身,對我呢 D 乾性皮膚來講唔夠勁。當然水洗的面膜都有好勁的,不過女人太多 item 要買了,樣樣都用到最 top 個荷包會乾得快過我。

每晚都敷面膜唔係人人都頂得順,唔係講要幾多錢,而係每個人的皮膚需要都唔同。護膚唔係比賽,唔可以「人有我有」,慌住會蝕底咁晚晚敷,有機會虛不受補爆哂瘡,又或者會敏感的,大家決定係唔係咁進取前,先要考慮一下自己皮膚係咩性質先呀。

晚晚敷面膜,唔一定要好富貴先至得。我有少部份面膜係屬於貴的,大部份面膜都係平價的。一黎要考慮經濟因素啦,而且強勁的且面膜都唔建議日日用,真係一星期用一次好勒,其他日子用返幾蚊一塊果 D 面膜就可以了。

早排托朋友在韓國幫我買了 UGB 的骨膠原面膜同蝸牛面膜,呢 D 比較貴的面膜 ($233/6片) 我一星期只會用一片。其餘六天,我會去莎莎 / 卓悅或韓國水貨店度買韓國面膜,最貴唔會過 $10/片,呢牌特別鐘情韓國面膜,一黎價錢好平,二黎剪裁比較適合我,三黎係而家周街都有得賣,唔駛搵丫嘛!哈哈!


今日諗住去買化妝棉,點知用開果隻賣哂,我就比旁邊的面膜吸引了。



$60/10片,雖然唔知係乜牌,但拎上手都幾「聚手」,按下包面膜感覺到係多精華果一種。於是我選了4款,每款買了一包。我仲會去搵 Innisfree 的 Royal Jelly Paper Mask,之前我有一塊贈品,一試難忘,一定要搵到佢,就可以完滿我今個冬季的面膜心願了。 

2013年12月5日 星期四

2013-14 冬季粉底

粉底係菲菲每天必用的化妝品,總之我要出街就必定會搽粉底。當菲菲仲後生時,主要用 Two Way Cake,因為皮膚質素好同埋夠方便,所以底妝要求唔高。

當皮膚越黎越乾,用 Two Way Cake 做底妝就會唔貼,同埋易出乾紋,所以近呢幾年,菲菲已轉用濕粉加碎粉去做底妝。雖然要花多少少時間同心機,但效果同後果都好好多!哈哈!我唔算係一個「粉底控」,但都有5支粉底液。


左一︰Shiseido Radiant Lifting Foundation SPF 15
左二︰Shu Uermura Light Bulb Foundation
左三︰Laura Mercier Moisture Supreme Foundation
左四︰Mabeline Super Mineral 24 Healthy Long Lasting Foundation SPF 25 PA+++
前排︰Shiseido True Liquid Moisture UV

我皮膚偏白,買親粉底都幾乎要買到最白的顏色。選擇顏色時,除左要注意自己膚色之外,仲要考慮質地同持久度。一般持久的粉底都會較乾,透薄的 coverage 又唔多夠,所以選粉底真係要去試清楚,唔好人話好就去買呀。以下係我對呢5支粉底液的個人評價,大家可以參考下。

Shiseido Radiant Lifting Foundation SPF 15
我係資生堂的 die hard fans,有 N 咁多樣資生堂產品,當然會用佢既粉底啦。呢支係舊年出的粉底液,賣點係有珠光效果。呢隻粉底唔可以大貪,只需要用少量就可以搽哂成塊面,珠光效果幾柔和,真係覺得有珍珠果種高貴而不浮誇的亮澤效果,適合優雅型的女孩。而且售價合理,舊年我買時好似係 $320,大家可以去專櫃度 check 下。

Shu Uermura Light Bulb Foundation
植村秀今年新品,又係用完有光感的粉底。賣點除左光感之外,就係有14種顏色可以選擇,我就選了帶粉紅的 (都有帶象牙色的,但我不太喜愛)。呢支粉底,我係睇了好多 YouTuber 分享之後買的,諗住咁多人推都應該唔錯啦,點知呢支價值 $400 的粉底,係雷品!

搽上面時效果真係好好,有光亮感亦算透薄,但可以在上妝後2小時就開始溶妝!我又唔想浪費左支粉底,就想盡辦法去解決溶妝呢個問題。最後,我終於搵到一個辦法係可以令個妝 keep 到一晚。冇錯,係一晚,唔係全日。因為日間我用咩產品同上妝方法去配合,結果都係溶妝,只有在晚上先至可以 keep 到下。上妝前唔可以搽 cream,用完精華素之後就用妝前打底霜,用佢附送的燈膽型美妝蛋印粉上面,之後用 Maquillage 的美白碎粉去定妝。我試過用 Laura Mercier 的碎粉去定妝,都唔得。呢支粉底,老實講我唔多鐘意,絕對不會回購。

Laura Mercier Moisture Supreme Foundation
我第一支 LM 粉底,係帶象牙的淺色。呢支係第一支我真心喜歡的 Ivory 粉底。以往的只會選帶粉紅的粉底,因為看上去較精神。但 LM 的顏色很適合我,Ivory 得黎唔會太土色。質地極易推,又可以 build up,在我面上唔溶妝,就算鼻位都係出少少油,印下就OK,超級大愛!所以我一口氣配埋碎粉、Two Way Cake (補妝用)、黃色 pressed powder 同埋 concealer,成為我底妝大愛!順帶一提,冇防曬的粉底係較易推,同埋影相唔會反光,只要用返有防曬的打底霜就可以了。

Mabeline Super Mineral 24 Healthy Long Lasting Foundation SPF 25 PA+++
我唯一一支開架品牌粉底,除左價錢平之外,真係幾持久。因為防曬度算高,我會在戶外活動時用呢支。一黎有 SPF 25,二黎唔駛成日補妝,係戶外活動的好拍檔。質感有少少厚,不算粉樣,但不算太自然果一種。如果眼妝清淡都冇乜問題,如果想化濃 D 的眼妝就顯得厚粉。全線顏色不論深淺都係帶象牙色的,喜愛簡單妝容的女孩不防一試。

Shiseido True Liquid Moisture UV
呢支係我最新買的,好似 $350左右。呢支質感比較滋潤但唔「立」,比較適合乾性皮膚或濕度低的日子用。我選了帶粉紅的顏色,而且都有亮澤感,個人認為配紅唇妝不錯。呢支冇 Radiant Lifting 果支咁光,想有少少光亮感的妝容可以考慮。

菲菲上濕粉時,最愛用資生堂的平頭濕粉掃。它比 Bobbi Brown 的濕粉掃更易用,可以推薄亦可以印厚,不食粉亦沒有掃痕。大家不防可以去專櫃度試下。

菲菲都有一支 Missha BB Cream,但個人不喜歡 BB Cream 的質感,所以甚少用。但點都會有一支看門口,以防萬一有日要九秒九出門時化唔切妝,都唔駛素顏示人嘛!

近期最愛的精華素 - It's Skin Power 10 系列

菲菲很喜歡用精華素,因為我已經不再年輕,加上係乾性皮膚,所以一次過要搽幾種精華素先至夠皮,亦都唔會怕塊面太「立」。除了 Bicelle 的 B5 係每日都會用之外,有好多精華素都係輪住黎用,近期我最愛的有5支 It's Skin 的 Power 10 精華素。


唔好意思,張相影得好矇添。 ^^"

左上︰GF Effector - 高度保濕鋇水
左下︰Propolis (蜂膠) - 保濕美白
右上︰Syn Snake (毒蛇) - 抗皺去細紋
右中︰Q10 Effector - 緊緻彈力
右下︰WR Effector - 抗皺彈力修復

以上精華都係朋友介紹比菲菲的,我亦都係托朋友在韓國幫我買的。以前我只迷信近千元一支的專櫃品牌精華液,從來冇諗過唔駛一百元的精華素都可以好有效。

GF Effector - 高度保濕鋇水
先講下支 GF,佢質地比 B5 薄少少,但都算係有唔錯保濕功能。反正我一晚都會用最少3支精華,保濕只係一個打底,太厚身反而令我搽唔到其他精華,所以各位「精華控」不防試下呢支,反正只係 $78/30ml,抵到唔駛講野啦!哈哈!妝前用都 ok,絕對唔會出擦膠碎,大家可以放心日間試。

Propolis (蜂膠) - 保濕美白
蜂膠呢支算係厚身的,仲有陣陣蜂膠的香味,感覺幾舒服。雖然係厚身,但都好快吸收。蜂膠除左保濕同美白之外,仲有修復細胞的功效。當然美白方面唔好諗住搽幾日就會白,但係晚上用完之後,日間會覺得色素係均勻咗,整體都健康的美白,唔會有「晶瑩剔透」或者白到好似張紙果種感覺。支就貴少少,承惠 $98/30ml (嘩!100蚊有找都叫貴…)

Syn Snake (毒蛇) - 抗皺去細紋
呢支精華真係不可多得,$98咋!呢支冇蜂膠咁厚身,都算易吸收,我試過日間用,化妝都唔會出擦膠碎。菲菲額上有少許細紋,之前不斷用保濕精華都只係 hold 住冇再增加細紋,但只限於 hold 住,未能退去。雖然呢幾條所謂細紋只有菲菲自己見到,連我老公都唔覺有,但係我都要盡快制止住佢,唔想由細紋變成皺紋呀。就係用左呢支毒蛇之後,我 d 細紋有慢慢減退的跡象。雖然唔係用完即時冇哂,但可以慢慢淡化,已經係好好了!

Q10 Effector - 緊緻彈力
呢支都係 $78,質地都有少少厚,仲有 d 粒粒響裡面。搽上面時輕輕推下,d 粒粒就會溶,唔需要擔心。因為都算厚身,我只會晚上用,未試過日間用。用完第二朝係有緊緻的感覺。唔係好緊果一種感覺,係覺得細胞緊密咗,好有彈性好年青的感覺。

WR Effector - 抗皺彈力修復
呢支都係 $78,質地唔算好厚,不過都要用完保濕之後用會好 d。呢支精華我用黎係預防皺紋的,我唔會等到有皺紋先至用,咁就太遲了!日夜都試過用,都 ok。亦試過在 paper mask 之前用,感覺真係緊緻 d,不防可以用黎做 paper mask 打底之用。


以上咁多支精華素,我係唔會一次過搽哂上面的。一般會在晚間做完 paper mask 之後用 2 支 (毒蛇、Q10、WR 或 蜂膠隨意選),日間就會用 GF 再選 2 支 (多數係先用毒蛇之後用 WR)。一次過用太多,就算係乾性皮膚都吸收唔到咁多,不要太貪心呀!

當然我唔止得呢幾支精華素,有機會再同大家分享啦!